തോറ്റവന്റെ സുവിശേഷം

അജ്ഞാത സുഹൃത്തേ...

എന്തിനു വൃഥാ
ഇന്നലകളിലെന്റെ
തിരുശേഷിപ്പ് തേടുന്നു?
എന്നേക്കുമായി
വിസ്മൃതിയുടെ
കാണാത്തുരുത്തിലേക്കു
എന്നേ ഞാൻ
കടത്തപ്പെട്ടിരിക്കുന്നു

മൗനം താഴിട്ടടച്ച
കാലത്തിന്റെ സാക്ഷ്യപത്രം പോലും
പരാജിതനെന്ന പ്രതിസംഞ്ജയിൽ
പേരോതുക്കിയിട്ടുണ്ടാകും
ദുരമുറ്റിയ എതിരിയെന്ന്
ലോകം വിജയിയെ പ്രതിധ്വനിക്കുന്നുണ്ടാകും

മടങ്ങുക നീ....
മറവിയുടെ മടിയിലെന്നെ
മയങ്ങാൻ വിട്ട്

മറക്കരുതൊന്ന് മാത്രം...

പരാജിതരുടെ
സ്മാരകശിലകളാണ്
സത്യത്തിൽ
വിജയികളെന്ന് നിങ്ങൾ കരുതുന്നവർ