സ്വപ്നം

പുഴയോരത്തൊരാണ്‍തീരം
പെണ്‍തീരത്തേക്കൊരു
പാലം സ്വപ്നം കണ്ടു

മരണം

പ്രണയത്തിനൊരു താജ് മഹല്‍ പോലും പണിയാതെ,
നാടന്‍ പരദൂഷണങ്ങളിലെ നായകരാവാനാകാതെ,
ഒരു കോളം വാര്‍ത്ത പോലുമാകാതെ,
അങ്ങനെയൊരുനാള്‍ നമ്മള്‍ മരിച്ചു….

കാത്തിരിപ്പ്

പകലൊടുങ്ങാന്‍ തുടങ്ങുന്ന

ഈ കടല്‍ക്കരയില്‍

ഞാന്‍ കാത്തിരിക്കുന്നു…

പാതി മുറിഞ്ഞൊരു കനവിന്റെ

പുനര്‍ജനിക്കായി…

ചേക്കേറാനൊരു കൂടും

 കൂട്ടിലൊരു കൂട്ടിനുമായി…

വഴി പിരിഞ്ഞേറെ ദൂരം

നീ പോയെങ്കിലും

വീണ്ടുമാപ്പഴയ വഴികളില്‍

തിരികെയെത്താനായി….

ഒന്നു കാതോര്‍ത്താല്‍ നിനക്കു കേള്‍ക്കാം

കോടക്കാറ്റൂതും പോലെ

എന്റെ നെഞ്ചില്‍

നിന്നോര്‍മ്മകള്‍ ഇരമ്പുന്നത്…

നിന്റെ കാത്തിരിപ്പിന്റെ കൂട്ടുള്ളപ്പോള്‍

ഞാനെങ്ങനെ ഏകനാകും?

മുഷിപ്പിന്റെ മൂവന്തി

നീണ്ട ഉച്ചയുറക്കം വിട്ടുണരുന്ന
ചില വൈകുന്നേരങ്ങളില്‍
ജനല്‍ പാളിക്കിടയിലൂടെ
പോക്കുവെയില്‍ വെച്ചു നീട്ടും
മൌനത്തിന്റെ കൂടയില്‍
ഒത്തിരി വിഷാദങ്ങള്‍...

എത്ര കുടഞ്ഞെറിഞ്ഞാലും
മുഷിപ്പിന്റെ മഞ്ഞ പടര്‍ത്തി
മനസ്സിലാകെ ആഴ്ന്നിറങ്ങും

മെല്ലെ, ഏകാന്തത തീര്‍ത്ത ആഴക്കയങ്ങളില്‍
പുതഞ്ഞാണ്ട് പോകും ഞാന്‍

പിന്നെ ചുറ്റും മുഴങ്ങി കേള്‍ക്കാം…
മടുപ്പിന്റെ മിടിപ്പു മാത്രം

ജനലിനപ്പുറം കാണാം
നിറങ്ങള്‍ കൊഴിഞ്ഞൊരു പകലിന്റെ ഖബറടക്കം

പെരുകി പെരുകിയങ്ങനെ ഇരുട്ടു പടരുന്നത്
മാനത്തോ, മനസ്സിലോ…?

നീരോര്‍മ്മകള്‍

പുതുമഴയില്‍ പുളക്കുന്ന
പരല്‍മീന്‍ കൂട്ടം പോലെ
പെയ്ത്തിലുണര്‍ന്നു പൊങ്ങുന്ന
മഴപ്പാറ്റകള്‍ പോലെ
മഴമണം മുറ്റുന്ന മോന്തിക്ക്
മൂളക്കത്തോടെ ചുരമാന്തിയെത്തി
കുറേ ഓര്‍മ്മകള്‍...

മഴ നനഞ്ഞലിയണം
പിന്നെ നീര്‍ച്ചാലുകളായ് തിരിഞ്ഞൊഴുകണം
മലനെറുകയിലൊരുറവയായി
വീണ്ടും പിറക്കാന്‍...

ദേശാടനപക്ഷി

എത്ര ദേശങ്ങള്‍ താണ്ടണം
എത്ര ദൂരം പറക്കണം
ഏതേത് കടല് കടക്കണം
ഇനി എത്ര നാള് കഴിയണം
കിനാക്കള്‍ പൂക്കുന്ന
പാടങ്ങളുള്ള
മായാനഗരിയിലെത്തുവാന്‍....

മഞ്ഞ് കാലം

മനസ്സിലിനി പ്രണയത്തിന്
മഞ്ഞ് കാലം

ഇല പൊഴിച്ച സ്വപ്നങ്ങല്‍
കഴുമരങ്ങള്‍ പോലെ

പുകമഞ്ഞായ് അലിയട്ടെ
ഓര്‍മ്മചിത്രങ്ങള്‍

ഒഴുകാതുറഞ്ഞ
മോഹപുഴക്ക് മീതെ
പൊഴിയട്ടേ ആലിപഴങ്ങള്‍

ഒരു മഞ്ഞുകൂടിനുള്ളില്‍
ഞാനുറങ്ങിക്കോട്ടെ,
ഇനിയുമൊരു വസന്തം വരും വരെ...